الله يسامح طاري البعد والشوق
...........والله يسهل ضيقتي واكتئابي

اضحك وانا من داخلي حيل مخنوق
...........وما اشوف غير الحزن قدام بابي

اقول هانت باكر تزين و تروق
...........توي صغير و ذي بداية شبابي

ويزيد فيني جرح و آلام و فتوق
...........وتضيق حتى من همومي ثيابي

العشره اللي مابها وصل وحقوق
...........بطوي بقايها واقفل كتابي

مدام فيها القلب ميّت ومحروق
...........وش حاجتي اشره وابين عتابي

دمرتني وانا معاملك بالذوق
...........ماكنت اعرف انك بداية خرابي



ايه اعترف لك كنت طايش ومطفوق
...........وماكنت حاسب للمفارق حسابي

لابد ماتفرج مع الوقت و اروق
...........ويعوّض الله خافقي في غيابي

والله لو لا طاري البعد والشوق
...........ماكان زادت ضيقتي و اكتئابي